愛+自然 作品展

對我嚟講，影相係為咗記錄：一些事情、一份心情、一刻感覺…… 唔知你睇到呢啲相，有咩感覺？諗起啲咩？作為影相嗰個，我對相片嘅印象相對係固定嘅，但係第二個會睇到啲咩，我真係好想知，所以如果可以，留個言啦。

我絕對不敢以攝影師自居，我亦唔覺得自己影相叻，只係喜歡得閒、有心情、有心機先影吓相，到依家仍然有好多相係照書影，最近睇返，都仍然覺得未見靈魂、未見意境。

一個機緣，兩個老友，三個人互相壯膽，造就呢次作品展。 不過，既然搞得，就要認認真真：呢兩個月，將過去8年、超過4萬張相睇過哂，發覺原來切合“愛+自然”呢個主題嘅相竟然少得可憐，都揀咗幾張自己喜歡嘅作品參展。相片中，最多出現嘅天，其次係海，呢啲就係我影嘅相之中最貼近自然嘅景物。